• USD/KZT 46220.11.2026EUR/KZT 50820.11.2026
  • info@joinup.kz
  • +7 727 3 500 300
  • +380 67 4336741 (Telegram Hot line)

Агенттерге

Таиланд күн батқаннан таң атқанға дейін: жағажайдағы демалыстан кейін Пхукетте немен айналысуға болады?

Айналаны ымырт басып, жағажайға арналған киімдер балконда кептіріліп тұр, дегенмен ұйқыға жатуға әлі ерте. Қараңғылық түсе бастағанда, Таиланд курорттары мүлде басқа ырғақпен өмір сүре бастайды.

Шатырдағы кештер, құм үстіндегі от шоулары, неонды көшелер мен клубтарда таң атқанша билеу — күн батқаннан таң атқанға дейін немен айналысуға болатынын айтып береміз.

Күннің батуын биік ғимараттың төбесінен тамашалау

Теңіз самалы, қолыңызда коктейль және шығанаққа баяу батып бара жатқан күн — тамаша кештің таптырмас үйлесімі. Ал егер қонақүйдің шатырына көтерілсеңіз, бұл сәт тіпті ерекше әсер сыйлайды.

Таиландта сауық кештері, тура мағынасында бұлттарға қарай көтеріледі.

Қайда барған жөн:

Kee Sky Lounge. Патонгтағы «The Kee» қонақүйінің шатырындағы лаунж – яхтаның палубасы үлгісінде безендірілген және шығанаққа тікелей қарайды.
Baba Nest. Аралдың оңтүстік-шығыс бөлігіндегі «Sri Panwa» курортының шатырында орналасқан бар. Ағаш террассасы жан-жағынан инфинити- бассейнмен қоршалған және осы Панва шығанағынан алыстағы аралдардың әсем көрінісі ашылады.

Кеңес: мұндай орындарда әдетте киім үлгісіне қатысты талаптар болады. Смокинг киіп келудің қажеті жоқ, күнделікті әрі сәнді киім smart casual1 жеткілікті. Ал шолақ шалбар мен ашық аяқ киіммен келген туристерді ішке кіргізбеуі мүмкін.

Кешті жағажай клубында өткізу

Күн батқаннан кейін де теңіз жағасынан кеткісі келмейтіндер үшін жағажай клубы таптырмас орын.
Су жағасында сезілетін ерекше тыныштықтың өз атауы бар — blue mind2. Бұл терминді теңіз биологы Уоллес Николс ойлап тапқан. Ол осылайша адамның теңіз жағасында болған кезде бойын билейтін жеңіл, медитацияға ұқсас күйін сипаттаған. Жағажай клубында күн көкжиекке3 батқаннан кейін де осы күйден шықпай, демалысты жалғастыруға болады.

Пхукетте Банг Тао жағажайында шоғырланған осындай орындар бар:

Catch Beach Club. Аралдағы осындай форматтағы алғашқы клуб әрі бүгінге дейін ең танымал орындардың бірі. Күндіз мұнда балалы отбасылар демалады, ал күн батқаннан кейін диджейлер мен музыканттар өнер көрсетіп, тақырыптық кештер ұйымдастырылады.
XANA Beach Club. «Angsana Laguna Phuket» қонақүйінің аумағында орналасқан. Мұнда бассейн жанындағы кештерге келетіндер көп.

Кеңес: әдетте шезлонгтарды кешкілік тез алып қояды, сондықтан туристерге оларды алдын ала брондауға кеңес берген жөн.

Отты шоуды тамашалау

Құм үстіндегі отты шоулар Таиландтағы жағажай кештерінің басты ерекшеліктерінің біріне айналған. Пхукетте туристік маусым кезінде мұндай шоуларды күн сайын тамашалауға болады.

Қайда барған жөн:

KYMA Beach Bar by Smigo’s. Патонг жағажайында күн батқаннан кейін әр кеш сайын құм үстінде отты шоу басталады, ал демалыс күндері диджей пультіне арнайы шақырылған диджейлер жайғасады.
Baba Pool Club. Панва мүйісіндегі «Sri Panwa» курорты әр сенбі сайын Андаман теңізінің әсем көрінісі аясында арнайы шоу ұйымдастырады. Бұл — отты шоуды жайлы әрі тыныш атмосферада тамашалағысы келетіндер үшін тамаша таңдау.

Қаланың басты түнгі көшелерімен серуендеу

Ірі курорттардың әрқайсысында түнгі өмірдің қыз-қыз қайнаған ортасына айналатын басты жаяу жүргіншілер көшесі бар. Пхукетте бұл — әйгілі Bangla Road, түнгі Патонгтың нағыз жүрегі.

Кешкі уақытта көше неон шамдары мен әуенге толып, әр қадам сайын көше әртістерінің өнерін тамашалауға болады.

Маңыздысы:

бұл — ересектерге арналған ойын-сауық. Мұндағы атмосфера шулы, барлар мен түнгі көңіл көтеру орындары көп, сондықтан балалармен бірге келуге кеңес берілмейді. Ал жұп болып немесе достармен серуендеу ерекше әсер сыйлайтыны сөзсіз.

Кеңес: өзіңізбен бірге міндетті түрде қолма-қол тай баттарын алыңыз — барлардың көпшілігінде шетел валютасы қабылданбайды.

Жанды музыка тыңдау

Егер туристер кешті жанды музыканың сүйемелдеуімен өткізгісі келсе, оларға музыкалық топтар өнер көрсететін барларға баруды ұсыныңыз. Курорттардың басты көшелерінде мұндай орындар өте көп.

Қайда барған жөн:

Red Hot Club. Bangla Road көшесіндегі жанды музыка орындарының ішіндегі ең көне әрі танымалдарының бірі.
Tai Pan. Түн ортасына дейін сахнада поп және рок жанрындағы танымал әндерді орындайтын кавер-топ өнерпаздары, ал одан кейін кештің көркін диджейлер қыздырады.

Таң атқанша билеу

Түнгі клуб өмірін тамашалауға келгендер үшін төменде негізгі мекенжайлары көрсетілген:

Illuzion. Bangla Road-да орналасқан үлкен түнгі клуб. DJ Mag журналының нұсқасы бойынша әлемдегі үздік он клубтың қатарына кіреді. Мұнда халықаралық деңгейдегі диджейлер өнер көрсетеді, ал жарық, дыбыс және шоу бағдарламалары ерекше ауқымымен таңғалдырады.
White Room. Illuzion клубының маңында орналасқан. Интерьері ақ түсті неон шамдарымен безендіріліп, футуристік стильде жасалған. Мұнда тақырыптық кештер жиі ұйымдастырылады.

Кеңес: кіреберісте жасыңызды растайтын құжатты тексеруі мүмкін, сондықтан жеке басыңызды куәландыратын құжатты өзіңізбен бірге алып жүрген жөн. Ал, би алаңында жеке заттарыңызды қараусыз қалдырмаңыз.

Таиландтағы демалыстың әр күні бір-біріне ұқсамауы мүмкін. Бүгін — шатырдағы террасадан шығанақтың тыныштығы мен әсем көрінісін тамашалау, ертең — судың жағасында отты шоуды көру, ал одан кейін — неон шамдары жарқыраған көшелерде таң атқанша би билеу.

Сіздің туристеріңіздің қайсысына күн батқаннан кейінгі Таиланд ұнайды?


1 Ағылшын тілінен — «Күнделікті элегантты стиль»
2 Ағылшын тілінен — «Көк сана»
3 Blue mind: Why we find the water peaceful